А вы ведалi, што каля вёскі Жодзішкі Смаргонскага раёна знаходзiцца адзiны штучны скаладром Беларусi?

• 11556
• 27 февраля 2023, 07:57
• Сморгоньфотомовапутешествияинтересно знать

На абрывістым беразе ракі Віліі каля вёскі Жодзішкі Смаргонскага раёна ёсць штучны скаладром, расказвае TG-канал Onlíner па-беларуску.

Што гэта такое?

Гэтае месца на беразе Віліі называецца Белая гара. У самым пачатку 1990-х пры ўдзеле Федэрацыі турызму Беларусі тут з'явілася выкладзеная з камянёў траса — штучны скаладром пад адкрытым небам. Унікальны ў сваім родзе аб'ект для краіны, якая не мае сваіх гор.

Відавочна, валуны не проста зваленыя ў кучу, а надзейна змацаваныя адзін з адным. Канструкцыі больш за 30 гадоў, а яна дагэтуль не развалілася і не абрынулася ў раку.

У 1990-х тут праходзілі турзлёты, трэніраваліся скалалазы і нават праводзіліся спаборніцтвы па альпінізму. Шкада, месца не атрымала далейшага развіцця. Цяпер яно прыцягвае ў асноўным байдарачнікаў і аматараў нестандартных маршрутаў.

Згодна з водгукамі ў інтэрнэце, узыходжанне на вяршыню, роўна як і спуск, дораць яркія эмоцыі. Зрэшты, многія прыязджаюць сюды проста дзеля прыгожых фатаграфій на камянях.

Захацелася пабываць тут?

Вось каардынаты: 54.640629, 26.401372. Толькі будзьце асцярожныя і лепш прыязджайце сюды вясной, у сухое надвор'е.