У чаканні другой будаўнічай чаргі. Рэстаўрацыя інтэр’ера царквы ў Мураванцы патрабуе дадатковых грашовых сродкаў

• 2395
• 06 февраля 2023, 06:44
• Щучинцерковьреставрациямова

Прамежкавыя вынікі рэстаўрацыі царквы Раства Прасвятой Багародзіцы ў Мураванцы ўжо можна ацаніць. Знешні выгляд храма значна палепшыўся. Вельмі важна, што былі адноўлены або заменены праблемныя элементы, якія ўплываюць на трываласць і даўгавечнасць будынка, пiша «Дзяннiца».

Аб’ёмы работ першай будаўнічай чаргі ўжо па-сутнасці выкананы. Звонку засталося толькі завяршыць працу над алтарным фасадам і цэнтральным уваходам. Плануецца, што вакол храма будзе рабіцца новая адмостка, таксама прывядуць да ладу крыжы на даху.

Асноўныя працы другой будаўнічай чаргі будуць накіраваны на абнаўленне ўнутранага выгляду храма. Справа ў тым, што ў інтэр’еры будынка сёння шмат элементаў з сучасных матэрыялаў, якія з’явіліся тут пасля мінулых рэстаўрацыйных работ. Таму сучасную тынкоўку заменяць на аўтэнтычную з вапны. Мяркуецца, што такія захады павінны вярнуць першапачатковы выгляд калонам і сценам храма.

Будуць ліквідаваны шчыліны ў мурах, таксама плануецца абследаванне, дэмантаж і замена пашкоджанай тынкоўкі. Будзе праводзіцца перафарбоўка і аднаўленне некаторых унутраных элементаў. У выніку інтэр’ер храма павінен набыць стылістычна адзіны аўтэнтычны выгляд.

Аб прамежкавых выніках рэстаўрацыі нам расказаў дырэктар ДП “Упраўленне капітальнага будаўніцтва Шчучынскага раёна” Аляксандр Малышка:

– На сёння зроблены дах царквы: былі адрамантаваны праблемныя ўчасткі, а таксама прымыканні да вежаў. Цалкам замянілі вадасцёкавую сістэму. Праблемныя цагліны, якія не маглі ўжо эфектыўна выконваць нясучыя функцыі, заменены элементамі з аўтэнтычных матэрыялаў. Адноўлена ўся знешняя тынкоўка. Сцены апрацавалі спецыяльнымі растворамі, якія павялічваюць трываласць цэглы і ахоўваюць яе ад цвілі і лішайнікаў. Засталося толькі давесці да ладу задні фасад. Таксама некаторыя знешнія элементы будуць афарбаваны, калі надыдзе спрыяльнае для гэтай працэдуры надвор’е.

Для таго каб працягнуць у 2023 годзе рамонтна-аднаўленчыя работы на царкве Раства Прасвятой Багародзіцы ў Мураванцы, патрэбна дадатковае фінансаванне ў 970 тысяч рублёў.

– Мы ўжо адправілі пакет дакументаў з абгрунтаваннем і разлікамі ў фонд Прэзідэнта Рэспублікі Беларусь па падтрымцы культуры і мастацтва, – дзеліцца намеснік старшыні Шчучынскага райвыканкама Таццяна Цюсіна. – Хутчэй за ўсё, вынікі прыняцця рашэння аб фінансаванні будуць вядомы не раней за сакавік. Спадзяваемся, што грошы выдзеляць, бо царква ў Мураванцы – гэта аб’ект вялікай значнасці не толькі для нашага раёна, але і для ўсёй краіны.

Таксама сваімі думкамі наконт рэстаўрацыі храма падзяліўся з намі благачынны Шчучынскай акругі іерэй Аляксандр Пасцерняк:

– Прыхаджане і святары не толькі Шчучынскага раёна, але і епархіі шчыра ўдзячныя фонду Прэзідэнта Рэспублікі Беларусь па падтрымцы культуры і мастацтва за тое, што аказалі вялікую дапамогу ў аднаўленні знешняга выгляду царквы Раства Прасвятой Багародзіцы. І просім, каб дапамаглі ў рэстаўрацыі інтэр’ера гэтага цудоўнага старажытнага храма. На жаль, сіламі прыхода і раёна зрабіць гэта немагчыма. У наступным годзе царкве ў Мураванцы споўніцца 500 гадоў, было б добра адзначыць гэтую падзею ў цалкам абноўленым храме. Упэўнены, што пакуль царква Раства Прасвятой Багародзіцы будзе стаяць, да таго часу малітвы будуць узносіцца ў ёй за ўсіх ахвяравальнікаў і ўсіх тых, хто дапамог яе адрэстаўраваць.